T20 World Cup 2024 : રોહિત શર્મા ન્યૂયોર્કની પિચ જોઈને ડરી ગયો? કુલદીપ યાદવને પ્લેઈંગ ઈલેવનમાંથી કર્યો બહાર

ટીમ ઈન્ડિયાના કેપ્ટન રોહિત શર્માએ T20 વર્લ્ડ કપ 2024માં આયર્લેન્ડ વિરુદ્ધ એક નિર્ણય લીધો જે ખરેખર આશ્ચર્યજનક છે. આ મેચમાં ભારતીય કેપ્ટને ટોસ જીતીને પહેલા બોલિંગ કરવાનું પસંદ કર્યું અને ત્યાર બાદ જ્યારે તેમણે પ્લેઈંગ ઈલેવનની જાહેરાત કરી તો કોઈને પણ તેના પર ખરેખર વિશ્વાસ ન થયો. કારણ કે રોહિત શર્માએ તેની પ્લેઈંગ ઈલેવનમાંથી મધ્યમ ઓવરોમાં સૌથી વધુ વિકેટ લેનારા કુલદીપ યાદવને બાકાત રાખ્યો હતો. આ સાથે તેણે યુઝવેન્દ્ર ચહલને પણ પ્લેઈંગ ઈલેવનમાં સ્થાન આપ્યું ન હતું.

જાડેજા-અક્ષર પટેલ પ્લેઈંગ ઈલેવનમાં

રોહિત શર્માએ પ્લેઈંગ ઈલેવનમાં રવીન્દ્ર જાડેજાની સાથે અક્ષર પટેલની પસંદગી કરી હતી. આ બંને ખેલાડીઓ લેફ્ટ આર્મ સ્પિનર ​​છે અને બેટિંગ પણ કરે છે. તો અહીં સવાલ એ છે કે શું ટીમ ઈન્ડિયાએ પોતાની બેટિંગ લાઈનઅપને લંબાવવા માટે આવું કર્યું? હકીકતમાં ન્યૂયોર્કની પીચ પર બેટિંગ કરવી મુશ્કેલ બની રહી છે. શ્રીલંકાની ટીમ અહીં 77 રનમાં આઉટ થઈ ગઈ, શક્ય છે કે આ મેચ જોયા બાદ ટીમ ઈન્ડિયાએ પોતાની બેટિંગમાં ઊંડાણ ઉમેરવાનો નિર્ણય કર્યો. વળી, રિષભ પંતને હવે નંબર 3 પર બેટિંગ માટે તક મળશે, એવામાં જોવું રસપ્રદ રહેશે કે આ પ્રયોગ કેટલો સાચો સાબિત થાય છે.

વિરાટ અને રોહિતની ઓપનિંગ જોડી

ટીમ ઈન્ડિયાના કેપ્ટન સંજુ સેમસનને પણ પ્લેઈંગ ઈલેવનમાંથી બહાર કરી દીધો છે. આ ઉપરાંત તેણે યશસ્વી જયસ્વાલને પણ પ્લેઈંગ ઈલેવનમાં સ્થાન આપ્યું ન હતું. મતલબ, ટીમ ઈન્ડિયાએ વિરાટ અને રોહિતની ઓપનિંગ જોડીને અજમાવવાનું નક્કી કર્યું છે. હવે સવાલ એ છે કે ટીમ ઈન્ડિયાને ન્યૂયોર્કમાં ત્રણ મેચ રમવાની છે, તો શું ભવિષ્યમાં કુલદીપ યાદવ અને યુઝવેન્દ્ર ચહલને પણ તક નહીં મળે?

ટીમ ઈન્ડિયાની પ્લેઈંગ ઈલેવન

રોહિત શર્મા, વિરાટ કોહલી, રિષભ પંત, સૂર્યકુમાર યાદવ, હાર્દિક પંડ્યા, રવીન્દ્ર જાડેજા, અક્ષર પટેલ, શિવમ દુબે, જસપ્રીત બુમરાહ, મોહમ્મદ સિરાજ, અર્શદીપ સિંહ.

આ પણ વાંચો : T20 World Cup 2024 : ભારત-પાકિસ્તાન મેચ પહેલા દિગ્ગજ ખેલાડીએ આપી ખાસ સૂચના