EPFO એ બંધ કરી આ સ્કીમ, જાણો તમારા પર તેની શું અસર પડશે

એમ્પ્લોઈઝ પ્રોવિડન્ટ ફંડ ઓર્ગેનાઈઝેશન એટલેકે EPFOએ 1 સપ્ટેમ્બર 2013 પછી સેવામાં જોડાનારા સરકારી કર્મચારીઓ માટે ગ્રુપ ઈન્સ્યોરન્સ સ્કીમ (GIS) હેઠળની કપાત તાત્કાલિક અસરથી રોકવાનો નિર્ણય લીધો છે.

એક મીડિયા રિપોર્ટ અનુસાર EPFOએ 21 જૂન, 2024ના રોજ જાહેર કરેલા એક પરિપત્રમાં જણાવ્યું હતું કે, 01.09.2013 પછી EPFOમાં જોડાનાર તમામ કર્મચારીઓના પગારમાંથી GIS હેઠળની કપાત તાત્કાલિક બંધ કરવામાં આવશે.

રિફંડ કરવામાં આવશે

આ નિર્ણયથી માત્ર તે જ સરકારી કર્મચારીઓને અસર થશે જેઓ 1 સપ્ટેમ્બર 2013 પછી સેવામાં જોડાયા છે. મીડિયા રિપોર્ટ અનુસાર કર્મચારીના પગારમાંથી કરવામાં આવેલી કપાત તેને પરત કરવામાં આવશે.

ક્યા કર્મચારીઓને લાભ મળશે?

સૂત્રો અનુસાર સરકારી કર્મચારીઓ કે જેમના માટે GIS બંધ કરવામાં આવ્યું છે તેમનો નેટ પગાર વધી શકે છે. અગાઉ GIS હેઠળ કર્મચારીઓના માસિક પગારમાંથી તેમના પગાર ધોરણ મુજબ કપાત કરવામાં આવતી હતી. તેથી કપાત બંધ કરવામાં આવશે અને તેમને વધુ નેટ પગાર મળશે. જો કે તેમાં કેટલો વધારો થશે તે અંગે કંઈ કહી શકાય તેમ નથી.

પરિપત્ર મુજબ પગાર વધારા ઉપરાંત આ કર્મચારીઓને 1 સપ્ટેમ્બર 2013 ના રોજ અથવા જોડાયા પછી કરવામાં આવેલી કપાતના બદલામાં એકમ રકમ પણ મળશે.

GIS યોજના શું છે?

કેન્દ્ર સરકારની જૂથ વીમા યોજના 1 જાન્યુઆરી 1982ના રોજ કેન્દ્ર સરકારના કર્મચારી જૂથ વીમા યોજના 1980ના નામથી અમલમાં આવી હતી. અહેવાલ મુજબ GIS એ ભારત સરકારના શ્રમ અને રોજગાર મંત્રાલય હેઠળની EPFOની એક સામાજિક કલ્યાણ યોજના છે જેનો હેતુ સામાજિક સુરક્ષા વ્યવસ્થા હેઠળ સભ્યો અને પેન્શનરો માટે જીવન સરળ બનાવવાનો છે. તે અકસ્માતોના કિસ્સામાં કામદારો અને તેમના આશ્રિતોને સામાજિક-આર્થિક સુરક્ષા પ્રદાન કરવા માટે ડિઝાઇન કરવામાં આવી છે. આ યોજનાના બે ઉદ્દેશ્યો છે – વીમો અને બચત.

આ કર્મચારીઓ GIS હેઠળ આવરી લેવામાં આવતા નથી

• કરાર કર્મચારીઓ
• પાર્ટ-ટાઇમ અને એડ-હોક કર્મચારીઓ
• કેન્દ્ર સરકારમાં 50 વર્ષની વય પછી ભરતી કરાયેલ વ્યક્તિઓ
• રાજ્ય સરકાર, જાહેર ક્ષેત્રના ઉપક્રમો અથવા અન્ય સ્વાયત્ત સંસ્થાઓમાં પ્રતિનિયુક્તિ પરની વ્યક્તિઓ
• વિદેશમાં મિશનમાં સ્થાનિક રીતે કર્મચારીઓની ભરતી

આ પણ વાંચો : Budget 2024 : સરકાર PSU કંપનીઓમાં OFS દ્વારા હિસ્સો વેચી શકે છે, યાદીમાં કઈ કંપનીઓનો સમાવેશ કરાયો?