સાબરકાંઠાના 7 તાલુકામાં નોંધાયો વરસાદ, ખેડબ્રહ્મા, હિંમતનગરમાં ધોધમાર વરસ્યો

સાબરકાંઠા જિલ્લામાં ચોમાસાના વરસાદની રાહ જોવાઈ રહી હતી એ મુજબ જ સોમવારે મોડી સાંજ બાદ વરસતા રાહત સર્જાઈ હતી. સાબરકાંઠા જિલ્લાના 7 તાલુકાઓમાં વરસાદ નોંધાયો હતો. જેમાં સૌથી વધારે વરસાદ ખેડબ્રહ્મા અને હિંમતનગરમાં નોંધાયો હતો. વરસાદને લઈ ખેડૂતો અને પશુપાલકોને મોટી રાહત સર્જાઈ છે.

જૂન માસના દિવસો એક બાદ એક વીતી રહ્યા હતા પરંતુ ચોમાસાનો વરસાદ નોંધાઈ રહ્યો નહોતો. જેને લઈ ખેડૂતો અને પશુપાલકોની ચિંતા વધી ગઈ હતી. ચોમાસુ ખેતી કરતા ખેડૂતો માટે ચોમાસાના વરસાદ પર આધાર રહેતો હોય છે, જે મોડો પડવાને લઈ ચિંતા વધી જતી હોય છે.

સૌથી વધારે ખેડબ્રહ્મામાં નોંધાયો

સોમવાર મોડી સાંજ બાદ ગાજવીજ સાથે વરસાદી માહોલ સર્જાયો હતો. મોડી રાત્રી દરમિયાન જિલ્લાના મોટાભાગના તાલુકાઓમાં વરસાદ વરસ્યો હતો. ખેડબ્રહ્મા અને હિંમતનગરમાં તો ગાજવીજ સાથે વરસાદ ધોધમાર તૂટી પડ્યો હતો. વરસાદના આગમનને લઈ ખેડૂતોમાં રાહત સર્જાઈ હતી.

જિલ્લામાં ખેડબ્રહ્મા તાલુકામાં સૌથી વધારે વરસાદ નોંધાયો છે. જ્યાં 33 મિલીમીટર એટલે કે સવા ઈંચ જેટલો વરસાદ ખાબક્યો હતો. જ્યારે હિંમતનગરમાં પોણો ઈંચ વરસાદ નોંધાયો હતો. હિંમતનગરના નવા, બેરણાં, કાંકણોલ સહિત આસપાસના પંથકમાં વરસાદ નોંધાયો હતો.

સાબરકાંઠા જિલ્લામાં નોંધાયેલ વરસાદ

• ખેડબ્રહ્માઃ 33 મીમી
• હિંમતનગરઃ 19 મીમી
• ઇડરઃ 18 મીમી
• વડાલીઃ 17 મીમી
• વિજયનગરઃ 16 મીમી
• પ્રાંતિજઃ 05 મીમી
• તલોદઃ 04 મીમી
• પોશીનાઃ 00 મીમી

અરવલ્લીમાં પણ વરસાદ

મોડી રાત્રે અરવલ્લી જિલ્લાના માલપુર, બાયડ અને ભિલોડા વિસ્તારમાં પણ વરસાદ નોંધાયો હતો. બાયડ તાલુકામાં એક ઈંચ જેટલો વરસાદ નોંધાયો હતો. ગાજવીજ સાથે વરસાદ વરસવાને લઈ ભારે બફારા બાદ રાહત સર્જાઈ હતી. માલપુરના અણિયોર પંથકમાં પણ ધોધમાર વરસાદ વરસ્યો હતો. જેને લઈ રસ્તાઓ પર પણ પાણી વહ્યા હતા. આમ ભારે ઉકળાટ અને બફારા બાદ વરસાદ વરસવાને લઈ મોટી રાહત સર્જાઈ હતી. મોડાસા અને તેની આસપાસના ગ્રામ્ય વિસ્તારોમાં પણ હળવો વરસાદ વરસ્યો હતો. આમ જિલ્લામાં વરસાદને લઈ મોટી રાહત સર્જાઈ હતી.

અરવલ્લી જિલ્લામાં નોંધાયેલ વરસાદ

• બાયડઃ 26 મીમી
• ભિલોડાઃ 10 મીમી
• માલપુરઃ 07 મીમી

આ પણ વાંચો: કુવૈતથી પરત ફરેલા અલ્પેશ પટેલે સંભળાવી આપવીતી, દવા-સાબુ માંગે તો પણ બેરહેમ માર પડતો

ગુજરાતના તમામ જિલ્લાના સમાચાર વાંચવા માટે અહીં ક્લિક કરો