જિમ જનારાઓ અને જિમ માલિકો માટે સૌથી મહત્વપૂર્ણ સમાચાર, FSSAI બનાવવા જઇ રહ્યું છે આ નિયમ

સોશિયલ મીડિયાનો પણ આ જમાનો છે. જો તમે રીલ્સની દુનિયાથી પરિચિત છો, તો તમે કોઈક સમયે આવા વીડિયો જોયા જ હશે જેમાં જીમમાં જનારાઓ પ્રોટીન પાઉડરનું સેવન કરે છે. આવા લોકોએ હવે સાવચેત રહેવાની જરૂર છે, કારણ કે આ બાબતની જાણકારી ધરાવતા લોકોએ જણાવ્યું હતું કે સરકાર અધિકૃત તબીબી પ્રમાણપત્ર વિના અથવા ભ્રામક લેબલિંગ દાવાઓ સાથે પ્રોટીન સપ્લીમેન્ટ્સ, પાઉડર અને શેક્સના મોટા પાયે વેચાણ પર કાર્યવાહી કરવાની તૈયારી કરી રહી છે. એક વ્યક્તિએ કહ્યું કે ફૂડ સેફ્ટી એન્ડ સ્ટાન્ડર્ડ ઓથોરિટી ઓફ ઈન્ડિયા (FSSAI) પ્રોટીન સપ્લીમેન્ટ્સ પર કડક નિયમો જાહેર કરવા જઈ રહી છે.

અભ્યાસમાં બહાર આવ્યું છે

FSSAIના અભ્યાસમાં બહાર આવ્યું છે કે સ્ટોર શેલ્ફ, જીમ અને ઈ-કોમર્સ પ્લેટફોર્મ પર ડઝનેક પ્રોટીન પાઉડર અને સપ્લીમેન્ટ્સ ખોટા અને ભ્રામક દાવાઓ સાથે વેચવામાં આવી રહ્યા છે. નામ ન આપવાની શરતે એફએસએસએઆઈના એક અધિકારીએ જણાવ્યું હતું કે બજારમાં ઘણા એવા પ્રોટીન ઉત્પાદનો છે જે ફાયદા કરતાં વધુ નુકસાનકારક છે. તેનો ઉદ્દેશ્ય કડક ધોરણો બનાવવાનો છે જેથી કરીને જાહેર આરોગ્યને કોઈ નુકસાન ન થાય.

જાણકાર લોકોના મતે, આ કાર્યવાહીથી નવા માપદંડોને પૂર્ણ ન કરતી ઘણી પ્રોડક્ટ્સના વેચાણ પર પ્રતિબંધ લાગી શકે છે. મેક્સ હેલ્થકેરના એન્ડોક્રિનોલોજી અને ડાયાબિટીસના ચેરમેન ડો. અંબરીશ મિથલે મીડિયા સાથેની વાતચીતમાં જણાવ્યું હતું કે પ્રોટીન ઉત્પાદનોનું ખોટું લેબલીંગ ખૂબ જ સામાન્ય છે અને તે ખૂબ જ ચિંતાનો વિષય છે.

જેના કારણે માર્કેટમાં વધારો થયો છે

જો કોઈ વ્યક્તિનો નિયમિત આહાર પ્રોટીનની જરૂરિયાતો પૂરી કરવા માટે પૂરતો ન હોય, તો તે પ્રોટીન સપ્લિમેન્ટ્સ લઈ શકે છે, પરંતુ મર્યાદિત માત્રામાં અને તબીબી માર્ગદર્શન હેઠળ. પ્રોટીન સપ્લીમેન્ટ્સનો ઉલ્લેખ કરતાં, Snapdeal અને Titan Capital ના સહ-સ્થાપક કુણાલ બહલે X પર 12 એપ્રિલે એક પોસ્ટમાં જણાવ્યું હતું કે, “મેં એક ખૂબ જ જાણીતી સ્થાનિક બ્રાન્ડને અજમાવી, ધારીને કે તે સુરક્ષિત રહેશે. 6-8 અઠવાડિયામાં તે મારા માટે ગંભીર સ્વાસ્થ્ય સમસ્યાઓનું કારણ બન્યું. સદભાગ્યે, એકવાર મેં તેને લેવાનું બંધ કરી દીધું, મારી તબિયતમાં સુધારો થયો.

ફિટનેસ વિશેની વધતી જતી જાગરૂકતાને કારણે ઘણા ઉત્પાદકો પૈસા કમાવવાનો પ્રયાસ કરી રહ્યાં છે. હેલ્થકાર્ટ અને એમેઝોન જેવા ઈ-કોમર્સ પ્લેટફોર્મ પર હાઈ પરફોર્મન્સ પ્રોટીન પાઉડરના જાર 2-3 કિલોના જાર માટે રૂ. 2,000 થી રૂ. 6,800માં વેચાઈ રહ્યા છે.