અદાણીનો 105 રૂપિયાનો આ શેર ખરીદવા રોકાણકારોની પડાપડી, જાણો શું છે કારણ

અદાણી ગ્રુપની એક કંપની એવી પણ છે જેના શેરની કિંમત રૂ. 110થી ઓછી છે. આ શેરનું નામ સાંઘી ઈન્ડસ્ટ્રીઝ છે. સિમેન્ટ બિઝનેસ સાથે જોડાયેલી આ કંપનીના શેરની કિંમત હાલમાં 105 રૂપિયાની આસપાસ છે. છેલ્લા કેટલાક દિવસોથી આ સ્ટોકમાં તોફાની તેજી જોવા મળી રહી છે.

14 જૂનને શુક્રવારની વાત કરીએ તો અગાઉ રૂ. 103.08ના બંધની સરખામણીએ આ શેર રૂ. 112.70 પર પહોંચ્યો હતો. જ્યારે ટ્રેડિંગના અંતે શેર રૂ.105.81 પર બંધ રહ્યો હતો. શેરમાં 2.65 ટકાનો વધારો નોંધાયો હતો. જાન્યુઆરી 2024માં રૂ. 156.20ના ભાવે પહોંચેલો આ સ્ટોક ગયા વર્ષે જૂનમાં રૂ. 65.58 જેટલો નીચે ગયો હતો. આ બંને ભાવ શેરના 52 વીક હાઈ અને લો છે.

શેરના ભાવમાં વધારો થવાનું કારણ

સાંઘી ઇન્ડસ્ટ્રીઝની પ્રમોટર કંપની અંબુજા સિમેન્ટે મોટો સોદો કર્યો છે. આ અંતર્ગત અંબુજા સિમેન્ટે ગુરુવારે હૈદરાબાદ સ્થિત પેન્ના સિમેન્ટને રૂ. 10,422 કરોડના એન્ટરપ્રાઇઝ મૂલ્યમાં રોકડ સોદામાં ખરીદવાની જાહેરાત કરી હતી. આ એક્વિઝિશન માત્ર ગ્રૂપને દક્ષિણ ભારતમાં તેની હાજરીને મજબૂત કરવામાં મદદ કરશે નહીં પરંતુ તેને શ્રીલંકાના માર્કેટમાં પ્રવેશવામાં પણ સક્ષમ બનાવશે. અગાઉ, અંબુજા સિમેન્ટનું શ્રીલંકામાં જથ્થાબંધ સિમેન્ટ ટર્મિનલ હતું, જે પાછળથી સ્વિસ બિલ્ડિંગ મટિરિયલ્સ મેન્યુફેક્ચરિંગ કંપની હોલ્સિમનો ભાગ બન્યું હતું. હોલસિમે 2022માં તેનો ઈન્ડિયા સિમેન્ટ બિઝનેસ અદાણી ગ્રુપને વેચી દીધો હતો.

કંપનીનું વર્ચસ્વ વધશે

દેશના બીજા સૌથી મોટા સિમેન્ટ ઉત્પાદક અદાણી ગ્રૂપે જણાવ્યું હતું કે તે હાલના પ્રોજેક્ટ્સના વિસ્તરણ પર ધ્યાન કેન્દ્રિત કરી રહ્યું છે અને પેન્ના સિમેન્ટના અધિગ્રહણથી તેને વાર્ષિક 140 મિલિયન ટનની ઉત્પાદન ક્ષમતા હાંસલ કરવામાં મદદ મળશે. કંપનીને આગામી ત્રણ-ચાર મહિનામાં આ સોદો પૂર્ણ કરવાની આશા છે. જો કે, આ નિયમનકારી અને અન્ય સરકારી મંજૂરીઓ પર નિર્ભર રહેશે.